قصيدة راعي البير في سعدون ابن عريعر

أشتهر به الشاعر الأمير محمد بن منيع الدوسري أمير بلدة البير وقصيدة قيلت في مدح الأمير/ سعدون بن عريعر بن دجين سنة 1170هـ
قصيدة تراثية من التراث الخالدي كادت أن تضيع كما ضاع أغلب تراث قبيلة بني خالد
من يومين وأنا أكتبها بالحرف حتى تبقى في الأنترنت
قصيدة أعتبرها معلقة
وصف الشاعر محمد بن منيع حدود حكم بني خالد من 257سنه
بقوله:

1مراقي العلا صعبٍ شديدٍ سنودها=يكود عن عزم الدنايا صعودها
2فمن رامها بالهون مانال وصلها=ولارد غيضات العدا في كبودها
3شراها بغالي الروح والمال والشقا=وصبرٍ على مر الليالي وكودها
4فلولا غلاها سامها كل مفلس=ولولا عناها كان كلٍ يرودها
5ولكنها بالحزم والعزم والشقا=مخاطر بحالات خفيٍ سدودها
6وبذل العطا في ماجب الحمد والثنا=وخضب الهنادي بالدماء من غمودها
7وغض نظير العين عن ذنب صاحب=تجي من صديقٍ زلةٍ مايعودها
8يجيب إلى نادي المنادي المطلب=سريع مطيع سالمٍ من حقودها
9وبالحلم عن زلات الأصحاب طوله=ولم العصا مايقطع الشر عودها
10فلا طير إلا بالجناحين طاير=ولاكف إلا بالقوى من زنودها
11فمن لايرد الغيظ بالكود زينت=له النفس حالاتٍ خبيثٍ ورودها
12ومن عنها بالصبر حتى يردها=يشوف مطاليع الهدى في ورودها
13فلا فايتٍ من صالحٍ في فواته=ولاطايلٍ في قطع كفٍ زنودها
14ولاخير في عينٍ حديدٍ نظرها=قريبٍ ويعما عينها عن حسودها
15فمن هاب خاب وعاش بان وأشرفت=عليه الأعادي طالبين حقودها
16ومن شرع الخطي ضحى الكون وأنتظى=نهار الوغى بيض الظبى من غمودها
17تحامى حماه الضد في زازح المدى=وذلت له أرقاب العدى في نجودها
18فلا تورد القالات إلا لجاهد=أياديه مايرجى الجدا من مدودها
19فمد الرجا وأقصد جناب تعودت=يمناه مدٍ من غوالي فيودها
20فمن عودك من فيض يمناه عاده=عليه الزمن بالصخا أن يعودها
21ومن فك عن زنديك بالعسر يسره=وهي كان ملوي عليها زنودها
22ترى إن كنت غاليت الثنا في مديحه=أجل عنك ماخاب الرجا في حصودها
23فلا غير سعدون ملاذي إذا غدت=علينا الليالي صايلاتٍ جنودها
24مدحته على ماكان مقدار فعله=فلا عاش كتام الحساني جحودها
25فهو لي على الشدات عونٍ وساعد=ويانعم مقصودٍ لنا من ضهودها
26بوجهٍ طليق بالبشاشات مشرق=وعينٍ على العاني قليلٍ صدودها
27بكفٍ حميدٍ من كريمٍ بنانه=وكم ذا جلا فقر المقلين جودها
28حريب الردى مسقي العدا شربة الكدا=من الغيض غصات الملا في كبودها
29حليف الثنا موضي السنا طارق الغنى=مقدام هباسٍ وباني عمودها
30حوى جميلات المعاني سمانها=وخلا المعايا للردايا تقودها
31ولابس ثياب الحمد بيضٍ جدايد=وللغير أبقى مارمى من جرودها
32وجدد فعال الزين في كل مطلب=يصيح الحساني وافيٍ في عدودها
33بحلمٍ وجودٍ وإحتمالٍ وهمه=وفرسات مقدارٍ تراها شهودها
34وصبرٍ على الجاني وعفوٍ وشيمه=ونفسٍ حماها عن مزاري نقودها
35وقول الوفا ماياكل الليل علمه=إلى سمعت أنذال الملا من قرودها
36مدى العمر ماجا زلةٍ يذكرونها=ولاخان عدوانٍ دماثٍ عهودها
37ثقيل مراز الحلم سهلٍ جنابه=وافي الرأى للملتجي عن ضهودها
38فلا طايشٍ يوم إلى نال نايل=ولاجازيه إلى صرف دنيا وكودها
39يزيد عن كود الليالي سماحه=إلى زادت الشدات يزداد جودها
40وللضيف عدٍ راكداتٍ أجفانه=تعادى بها حمر الرعايا وسودها
41تظل مع الجيران والضيف كنه=ورود الضمايا مالها من يرودها
42وكم ذا وطا دار المعادي بغاره=صباحٍ وأهلها ماتهنى رقودها
43وكم جفن جفرات الصبايا بصوله=ضعاينٍ تحدا مقرشاتٍ جهودها
44على أثر شبانٍ نشاما لكنهم=أسود لزا الغابات بادٍ جرودها
45وهجنٍ طوايا ناحلاتٍ لكنها=من السير قيانٍ يرى السير قودها
46تساما بشبان وخوطٍ من الخبا=ينالن قناص الوالي صيودها
47ينالن مالك طال ماصبح العدا=على حومة الجبان ماهيب سودها
48ونحن عن بيض العذارى أرخالها=وأناج يقرى مالها من شرودها
49وضفا الحساب عن بقايا قطيعه=تلقاه عن سوء الليالي سعودها
50فهو فارس الهيجا وهو بارع الصخا=وهو كاسب من كل الأنوى عمودها
51مقدام خيلٍ والقنا في نحورها=ومعطي جوايدها وحاني قعودها
52جواده عرجا والسبايا بطايح=وكفه ريانٍ من الدم عودها
53إلى أركضت يومٍ على الضد خيله=فمركوب ممدوح السبايا عمودها
54حمى من ربى هجر إلى ضاحي اللوى=إلى الشام من دار آل عمرو حدودها
55إلى خشم رمان إلى النير مجنب=إلى الشعرى وطمانها مع نجودها
56إلى العرض للوادي الحنيفي مشرق=وعن ماشمالٍ كل هذي يسودها
57إلى طاب منها مرتع جاده الحيا=رعاها على رغم العدى من يشودها
58تناحت بسكان الحمى عن طريقه=كوصف وعولٍ قاصداتٍ صيودها
59إلى مايوافقهم من الشيخ جيره=غدت رملا شتى قليلٍ ركودها
60فما جردات السبايا متوج=ولاحظنت بيض النساء في مهودها
61ياوفى جميلٍ من معاني جميله=وأصخا يمينٍ بالعطا من مدودها
62فيا من علا فوق العلا كل طايل=وزاده ببنيانٍ رفاعٍ بنودها
63فرضت لي فرضٍ قديم ورسمته=بخط يدي ورث الندى من شهودها
64وذا العام ياكساب الأنفال خامس=ولاجاك منا طالبٍ في نشودها
65غدا الرجا به مثل راعي وداعه=وثيقٍ عليها آمن من جحودها
66وذا اليوم ياكساب الأنفال قادنا=إليها أمورٍ موجعاتٍ بدودها
67فجد غير مأمور بتنجيز حاله=وبكر بها وأجعل جوابي صفودها
68وغداً تنال العفو من فضل قادر=إلى حضرت مع كل نفسٍ شهودها
69ومبغضك بالمهفات والذل والعنا=وغيضٍ مع العدوان يملا كبودها
70والأقدار فيما شئت تجمع على الرضا=بحكمة خلاق البرايا يقودها
71وأزكى صلاة الله إلى ديرةٍ بها=وآفي سلامٍ كاملاتٍ عدودها
72على المصطفى والآل ماناح ربعي=حمامٍ يغني مطرباتٍ خرودها